NAGA CITY-Liwat na nagpositibo sa iligal na droga an Barangay Kagawad na presenteng nakakulong sa custodial facility kan Iriga City PNP makalihis an pigkundusir na Oplan Galugad kan mga otoridad.
Sa nagunong impormasyon kan Bombo Radyo Naga, napag-araman na nagibo nin biglaang Oplan Galugad an operatiba sa nasambitan ng custodial facility kunsanen narekober sa tolong preso na kinababalehan ninda Barangay Kagawad Alan Alanis, Oliver Oñedo asin Jobert Ranido an apat na sachet kan pigtutubudang shabu asin mga drug paraphernalia.
Kung marurumduman, enot nang nadakop si Alanis sa sarong operasyon kunsaen nakuanan ini nin maabot sa 150 grams kan pigtutubudang shabu.
Enot naman na kinumpirmar ni P/Supt. Alex Pederio, Chief of Police (COP) kan Iriga City PNP na an nasambitan ng opisyal an nagtitindog komo supplier kan iligal na droga sa nasambitan ng syudad asin sa iba pang mga pagtaraed na banwaan.
Sa ngunyan, pigpepreparar na an bagong kaso na igwa man giraray nin koneksyon sa RA 9165 o Comprehensive Dangerous Drugs Act of 2002 na isusunad kontra sa nasambitan ng mga suspetsado.
