NAGA CITY – Mahigot na an pigsasagibong pagbabantay ngunyan kan pamayuhan kan Barangay Council kan San Francisco, Naga City katakod kan nagdadangadang na kasiributan sa syudad.
Sa nagin paghampang sa mga kagawad kan media ni Efren Nepomuceno, kapitan kan San Francisco, Naga City, sinaysay kaini na nagigin mahigot na man an saindang monitoring asin pagbabantay sa saindang nasasakupan huli sa pinaglalaoman na liwat na pag-abot kan mga kawatan sa syudad kasabay kan nagraraning selebrasyon kan Penafrancia Festival.
Nagpaabot man nin pasasalamat an opisyal huli sa pakikipagtabangan kan saindang mga personahes sa pagmantinir kan paz y orden sa saindang lugar.
Ini orog na ta igwa na naman nin mga nabibiktima nin mga budol budol sa saindang area.
Sa ngunyan, hagad na sana kan opisyal sa gabos na nagpapaupa nin mga boarding house na bistohon asin siertohon na mga marhay na tawo an papadaguson sa saindang mga harong huli ta posibleng nagpupuon na an mga ini na maghanap nin maiistaran sa syudad.
Apwera pa digdi, kada aldaw man nin Sabado nagpaparabus sinda sa saindang kapalibutan tanganing mamantinir an kalinigan asin malikayan an anuman na helang na pupwedeng magbungkaras orog na ngunyan na panahon kan tag-uran.
