NAGA CITY- Piglinaw ngonyan kan kampo ni Vice President Leni Robredo na mayong katotoohan an nagluluwas na mga bareta na 20,000 na boto na an nawawara sa opisyal sa nagpapadagos na recount sa mga balota hale sa probinsya nin Camarines Sur.
Sa entrevista kan Bombo Radyo Naga ki Atty. Emil Maranon, legal counsel kan bise presidente, sinaysay kaini na ‘exaggerated’ suboot an nasambitang impormasyon asin parte sana kan propaganda kan kampo ni dating senador Bongbong Marcos.
Mahigot na pignegar ni Maranon na dakulang numero nin mga boto an nawawara sa bise presidente sa nagpapadagos na recount sa Presidential Electoral Tribunal (PET) katakod kan pigsunad na electoral protest kan dating Senador laban ki Vice President Robredo.
Sa ibong na lado, pigtuga man ni Maranon na igwang botong nawawara sa opisyal huli naman sa pagbasura kan Korte Suprema na nagtitindog na PET sa hurot kan saindang lado na utubon an enot na direktiba kan Commission on Elections (Comelec) na 25 percent threshold sa shading kan balota kan May 2016 elections.
Mientrastanto, sigon ki Maranon, harani nang matapos an recount sa mga balota hale sa Camarines Sur huli ta tapos na an haros 1,000 na mga ballot boxes hale sa kabilugang 1,813 na numero kaini.
Nilalaoman man na tulos na pupunan an recount sa probinsya nin Iloilo kun natapos na an pagbibilang nin boto hale sa Camarines Sur.
