Dumating sa Pilipinas ang barkong Sara Sky na may dalang mahigit 700,000 bariles ng krudong langis mula Russia, ilang araw matapos magdeklara ng Pangulong Ferdinand Marcos Jr. ng national energy emergency dahil sa digmaan sa Gitnang Silangan.
Ang barko, mula sa ESPO pipeline ng Russia, ay dumaong sa Limay port malapit sa Maynila kung saan matatagpuan ang Petron Corporation, na tumanggap ng kargamento para sa kanilang oil refinery. Ito ang inaakalang unang shipment ng langis mula Russia sa bansa sa loob ng limang taon.
Ayon kay Petron CEO Ramon Ang, nakikipag-usap ang kumpanya sa Russia para sa posibleng pagbili ng langis, ngunit hindi niya kumpirmadong dumating na ang kargamento.
Sinabi ni Pangulong Marcos na naghahanap ang Pilipinas ng iba’t ibang mapagkukunan ng langis dahil inaasahang tatagal lamang ng 45 araw ang kasalukuyang supply. “We have not only gone to our…traditional oil suppliers, we have tried to explore other sources that are not affected by the war that is ongoing in the Middle East,” aniya.
Sa gitna ng krisis, niluwagan ng Estados Unidos ang ilang restriksyon sa pagbebenta ng Russian crude, pinapayagan ang mga shipment na nasa dagat hanggang Abril 11. Tinaya naman ng analyst na si Muyu Xu na humigit-kumulang 120 milyong bariles ng Russian oil ang nasa dagat sa panahong iyon, karamihan ay maaaring nakalaan na sa China o India.
Kasabay nito, in-activate ng Department of Energy ang P20-bilyong emergency fund bilang “proactive step” para matiyak ang suplay ng langis, ayon kay Sharon Garin. Plano rin nitong pansamantalang pataasin ang produksyon ng coal-fired power plants upang mabawasan ang gastos sa kuryente habang apektado ang suplay ng gas.
Dahil sa pagtaas ng presyo ng liquefied natural gas (LNG), mapipilitan ang bansa na pansamantalang umasa sa coal, kung saan sinabi ni Garin na walang limitasyon ang Indonesia, pangunahing supplier ng coal, sa dami ng maaring bilhin ng Pilipinas kung kinakailangan.
