Pigsugo ni BARMM Chief Minister Abdulraof Macacua an gabos kan ministro, panduwang ministro, asin mga pamayo kan opisina asin ahensiya kan Bangsamoro Autonomous Region in Muslim Mindanao (BARMM) na magsumiter kan saindang courtesy resignation na dapat dae maglampas an pagpasa sa Hunyo 30.
Sigun sa laog kan memorandum, huli sa mga seryoso asin magagabat na reklamong pigsunad sa opisina kan BARMM Chief asin tanganing mapamarhay an kahusayan asin pagigin epektibo kan paghahatod knin serbisyo sa pagtatapos kan transition period sa Bangsamoro, an gabos kan opisyal an pigsugo na magpasa kan saindang courtesy resignation.
Dugang pa sa circular na kun enkaso magsayuma o mabigong magsumiter nin resignation an siisay man na nabanggit na opisyal sa pigtalaan na petsa, pigkokonsiderar na nagbutas sinda sa saindang tungkulin.
Siring man, piglinaw man sa memoranduman na kinakaipuhan pa man nindang maglaog sa trabaho asin gampanan an saindang tungkulin hasta magkaiga nin aksiyon mapadapit sa saindang resignation.
Mientrastanto, sign man ki Commission on Elections (COMELEC) Chairman George Erwin Garcia, pigre-review na kan poll body an progreso kan pagsusumiter kan courtesy resignation tanganing maipadagos an pagpreparar kaibahan an mga opisyal asin pamayo kan mga ministro para sa primerong parliamentary elections sa BARMM.
Pagsisierto ni Garcia na nagtitinir na marhay an katoninongan asin kaayusan sa rehiyon.
Alagad huli sa mga courtesy resignation asin nagdadangadang na kampanya, sinaysay kaining pwedeng magbago an sitwasyon.
Dugang pa ni Garcia, natapos na kan COMELEC an source code review komo parte kan automated election system para sa parliamentary elections.
Naipasar na man soboot sa COMELEC En banc an mga draft kan ballot face para sa pag-abrobar.
Siring man, pinalawig hasta Hulyo 18 an pagsusumiter kan mga kadawan kan kandidato para sa balota tanganing matapos an database.
Mientrastanto, sa katakod pang bareta nakatalaang makipag-meeting si Garcia sa Bangsamoro tanganing ilahad an mga preparasyon an saindang piggigibo.
Pig-iinspeksiyonan man ninda an kampo kan 6ID huli ta ini an saindang planong gibuhong operation center, canvassing center, pati na man media center sa eleksiyon.
Kaibahan sa saindang pag-uulayan iyo an sitwasyon kan katoninongan sa lugar mantang nagpepreparar sinda para sa parliamentary elections.
