NAGA CITY- Pig-abisohan kan BFAR-Bicol an mga fish cage owner sa Rehiyong Bikol partikulamente sa Buhi asin Baao-Bato lake na maglow stocking o babaan an pag-stock kan sira sa tahaw kan naeeksperyensiyahan na init kan panahon.
Sa entrevista kan Bombo Radyo Naga ki Rowena Briones, tagapagtaram kan Bureau of Fisheries and Aquatic Resources-Bicol, maski mayo pang nairehistro na mga parasisira an deriktang naapektuhan kan El Niño Phenomenon, padagos man an saindang mga pigsasagibong lakdang tanganing mabantayan an mga siraan sa bilog na Bicol Region orog na sa mga darakulang banwaan na nagsusuplay kaini.
Sigun pa sa opisyal, dae ninda pighahali an posibilidad kan pagkakaigwa nin fish kill, red tide, asin coral bleaching o an abnormal na pagbabago sa mga corals na posibleng magin kawsa kan saindang pagkagadan orog na sa mga masunod na bulan.
Dugang pa ni Briones, kada igwa nin naeeksperyensiyahan nin labing init kan panahon, nagbababa man an survival rate kan mga sira na maresulta man sa pagkalugi kan mga parasisira asin pagbaba kan suplay kan mga ini sa mga merkado publiko.
Katakod kaini, dagos-dagos man an saindang pigsasagibong water quality monitoring sa gabos nin mga parasisira asin mga lawa tanganing mabantayan an kamogtakan kan mga ini asin masierto na kun igwa mang maglataw na problema, tolos na matawan nin solusyon
Tinawan-duon pa kan opisyal na antes pa man maglaog an nasambitan ng weather phenomenon, nakalatag na an mga plano kan nasambitan ng ahensya tanganing malikayan an malalang epekto kaini sa mga siraan sa rehiyong bikol.
Sa ngunyan, regular pa soboot an status kan mga lawa asin mayo pang naireport na fish kill incident sa rehiyon.
