Renirecognisar kan Bureau of Fisheries and Aquatic Resources -BFAR Bicol an mga hamon na kinakahampang kan mga parasira huli sa paglangkaw kan presyo kan produktong petrolyo dara kan kariribukan sa Middle East.
Sa intrevista kan Bombo Radyo Naga ki Wheng Brecia-Briones, an Spokesperson kan BFAR -Bicol, antes pa an krisis igwa na nin fuel subsidy program an BFAR asin obheto kan programang ini na matabangan an mga parasisira sa saindang konsumo sa gasolina asin sa paagi kan sarong Card, P3,000 an nariresibir kan lambang parasira asin ini an ginagamit kan mga parasira tanganing makapagpagas sa mga accredited na gasolinahan kan saindang ahensya.
Sa presente, nakapagdistrebwer na an BFAR nin 12,262 cards para sa mga rehistrading parasira. Sigon sa tagapagtaram kan BFAR-Bicol, mga rehistrado kan RSBSA registry system para sa basic sector kan Agrikultura.
Saro ining data base na Kun sain nakabugtak an data kan mga parasira asin mga paraoma asin an mga benepisyaryo kan programa idtung mga lehitomg parasira na igwa nin motorized banca.
Sa Rehiyon Bicol, igwa nin poco as o menos 38,000 na rehistradong igwa nin motorized banca asin an target kan ahensya na Matawan ayuda an nasa 14, 776 na mga parasisira huli ta iyo pa sana ini an napondohan kan ahensya asin 12,262 na an natawanan kan Card para sa fuel subsidy na nagkakantidad nin 36.7million pesos or nasa 82.99 percent na an roll out kan BFAR-Bicol.
Padagos an distribusyon kan fuel subsidy kan BFAR na Kun sain sa ngunian nasa 3,000 na saan an natatadang benepisyaryong dai pa nakakaresibir kan subsidiya.
Dagdag pa kan opisyal na nagtao na nin deriktiba an National Director kan BFAR katuwang an Department of Agriculture na rikasan na an distribusyon kan fuel subsidy sa mga parasira Lalo na ta sa presente igwa nin kinakahampang na krisis an nasyon.
Pighihinguwa kan ahensya asin naglalaom an opisyal na mas madagdagan pa an saindang pondo tanganing mas matabangan pa an sektor kan mga parasisira sa Rehiyon Bicol.
