NAGA CITY- Liwat na nagpagirumdom an BFP Bula sa publiko enkaso igwang magbungkaras na grassfire o anuman na klase kan kasulo sa saindang lugar.
Sa entrevista kan Bombo Radyo Naga ki SFO3 Dennis B Mendez, R.N, Officer-in-Charge kan Fire Station Bula, sinaysay kaini na kaipuhan na tolos na maabisuhan an saindang opisina tanganing makapagresponde sa kasulo asin malikayan na magdakula pa an kalayo.
An nasambitan ng pangapudan an kasabay kan nairehistrong grassfire sa may parte kan Zone 7 Barangay Lanipga, Bula, Camarines kasuudma pasado alas 11:03 nin pagka-udto.
Katakod digde, pighihiling na rason kan pagbungkaras kan kasulo an huli sa pagsisiga nin basura sa lugar na sarong private property.
Sigun ki Mendez, namanehar man tolos ini kan saindang mga personahe orog na ta presko pa man an mga tanom sa 500 square meters na area.
Pigtawan duon kan opisyal na kadakol an naglalaog digde kun kaya dipisil soboot an pag-araman kun isay an igwang paninimbagan kan nasambitan ng insidente.
Mientrastanto, mayo man naapektaran sa nagbungkaras na grassfire huli ta mayo man mga harong sa area sulamenteng mga bamboo asin mga duot sana an yaon sa lugar.
Sa ngunyan, pakiulay na sana ni Mendez sa publiko na enoton an pagreport enkaso igwang manutaran na kasulo tanganing tolos man na makapagreposponde an saindang hanay sa emerhensiya.
