NAGA CITY- Nagpagirumdom sa publiko an BFP Camaligan dapit sa mga dapat na gibuhon enkaso magbungkaras an kasulo.
Sa entrevista kan Bombo Radyo Naga ki SFO4 Mario Reburiano Jr, OIC Fire Marshal kan BFP Camaligan, sinaysay kaini na dakulaon an partisipasyon kan kada miyembro kan pamilya sa pag-apula sa kasulo nin huli ta sinda an enot na maresponde digde.
Apwera digde, kaipuhan man na siertuhon kan publiko na an mga dae ginagamit na appliances sa harong an dapat dae nakasaksak tanganing makalikay sa overheating na pwedeng pagpuonan kan insidente.
Sigun pa ki Reburiano, kaipuhan man na likayan kan publiko an overloading asin pirmeng siertuhon na marhay pa an mga wirings sa laog kan harong.
Para man sa mga tawo na nakahiling nin kasulo tolos na mag-apod sa hotline kan BFP tanganing tolos na makapagresponde an mga bumbero asin maapula an kalayo tanganing dae na magkuriyat pa.
Mientrastanto, an nasambitan ng pagpapagirumdom an katakod sa nangyaring kasulo kasuudma kun saen an rason an huli sa heater na dae namangnuhan na nag overheat asin nagkawsa nin kalayo sa nasambitan ng banwaan.
Mayo man soboot nairehistro na casualties sa insidente asin minimal sana man an nagin danyos alagad kaipuhan na magin malikay an gabos tanganing dae na ini liwat pang manyari.
Sa ngunyan, hagad na sana kan opisyal an pakikipagtabangan kan publiko sa paglikay sa kasulo orog na ngunyan na naeeksperyensiyahan an labing init kan panahon.
