NAGA CITY- Pigtawan-duon kan sarong opisyal kan Bureau of Fire Protection (BFP) sa probinsya nin Camarines Sur an importansya kan pagkontak tulos sa saindang opisina enkaso igwa nin emerhinsya.
Sa nagin patara-tara ni FO3 Ronel Beraquit, kan BFP Libmanan, Camarines Sur pigsaysay kaini na basado sa report, kada igwa nin nagbubungkaras nin kasulo, pirming nahuhuri an pag-apod sa saindang opisina nin huli ta mas pig-eenot pa soboot kan mga tawo an paglive sa social media.
Sigun ki Beraquit, makalihis na makaresiber nin apod an saindang opisina, nagdudurar pa nin pirang oras antes makaabot sa pinangyarihan an saindang mga personahes apwera pa ini sa rayo kan lugar kun kaya. Alagad kaya man soboot magresponde sa paagi kan ruby time alagad igwa pa nin mga sitwasyon an imbes na maggilid na an mga behikulo na yaon sa tinampo na saindang aagihan, an iba dae pa naggigilid tanging tawan sinda nin dalan.
Huli digdi, pangapodan na sana kan opisyal an kooperasyon kan lambang saro orog na sa oras nin emerhensisya. Dugang pa kaini, na sa kada pigkukundusir nindang seminars, an pirmi nindang pigsasabi asin pigtatawan-duon an early reporting sa mga partisipantes.
Apwera pa digdi, pigpapasave man soboot ninda an hotline number kan saindang departamento sa saindang mga cellphone.
Piglinaw man kan opisyal na bako sanang pagpuho nin kasulo an trabaho kan saindang lado, alagad pigpopokusan man ninda an manlaen-laen na aktibidad dapit sa fire prevention.
