NAGA CITY- Nakafull alert status na an BFP Provincial Office Camarines Norte sa nagraraning kapaskuhan asin pagsabat kan bagong taon.
Sa entrevista kan Bombo Radyo Naga ki FCINSP Adonis Osea, Deputy Provincial Fire Marshal, BFP Camarines Norte, sinaysay kaini na sa pagselebrar kan kapaskuhan ngunyan na taon, asin sa maabot na bagong taon, nakapreparar na an saindang ahensya siringkan pagkundusir nin fire prevention, asin an oplan paalala iwas paputok, kun saen required an gabos na BFP Personnel na ipautob pa an manlaen-laen na aktibidad tanganing pagirumdoman an mga establishemento asin publiko tanganin man magin matuninong asin salbado an selebrasyon kan pasko asin bagong taon sa saindang probinsya.
Apwera pa digdi, nakaipagkoordinar naman an saindang lado sa iba pang ahensya siring kan PNP, LDRRMO, Lokal na gobierno asin magin sa mga Barangay Officials.
Kamawotan man kan opisyal na maobserbaran nin marhay an mga designated areas kun saen sana pwedeng magpaputok an mga tawo siringman an pagsunod kan mga parienda kan mga legal na paputok.
Mientrastanto, pigheras man an kan sarong pag-opisyal an mga paputok na ipinagbabawal.
Sigun ki FO2 Joan Toledo, Provincial, Chief Public Information Officer kan nasambitan ng ahensya, na an mga paputok na mahigot na ipinagbabawal an watusi, piccolo nin huli ta madali ining mabakal asin barato partikulamente na kan mga kajovenan. Apwera pa digdi, ipinagbabawal man an Mother Rockets, Pillbox, Boga, dakulang Judas Belt, Big bawang asin Goodbye Philippines.
Mantang sa mga pwede man na paputok yaon an Bawang, Baby rockets, small Triangulo, paper craft, skyrocket, loses, fountain, roman candles, whistle device asin butterfly.
