NAGA CITY-Liwat na nagpagirumdom an BFP-San Fernando sa publiko sa mga dapat gibuhon tanganing makalikay sa kasulo ngunyan na igwang pigbabantayan na raot kan panahon.
Ini an kasunod kan nagbungkaras na fire incident sa saindang lugar kasubangi.
Sigun ki Fire Inspector Alfonso Capillano Jr, Acting Municipal Fire Marshal kan BFP-San Fernando, sa panahon kan kalamidad, padagos soboot an saindang ginigibong pagbabandilyo tanganing makapagheras nin impormasyon sa publiko sa mga dapat gibuhon tanganing makalikay o magin salbado sa kasulo, baha, bagyo asin iba pa.
Dugang pa ni Capillano, kaipuhan na magin aware an publiko tanganing maisalba ninda bako sana an saindang mga sadiri kundi an saindang mga pag-iriba sa harong o ibang tawo.
Pigsaysay pa kan opisyal na haros gabos na barangay napagkundusiran na ninda nin mga seminars asin trainings kun saen pig-eenkaminar an mga ini na magbilog nin Community Fire Protection Plan and Community Fire Auxiliary Group.
Katakod digde, makundusir man nin house to house survey an BFP-San Fernando siringman an pagsagibo nin Simulation Exercise.
Sa ngunyan, pinayuhan na sana ni Capillano an publiko na magin updated sa kamugtakan kan panahon asin rumdumon an mga paagi tanganing malikayan an kasulo.
