Pig-anunsyar ni Presidente Ferdinand Marcos Jr na ila-livestream an bicameral conference committee meeting para sa 2026 national budget komo lakdang pasiring sa mas bukas asin tapat na deliberasyon.
Sigun sa Presidente, ini an napagkasunduan ninda ni Senate President Vicente Sotto III asin ni House Speaker Faustino Dy III tanganing tawan nin tyansa an publiko na masubaybayan an proseso kan pagbilog kan pambansang pondo, kaibahan na an mga posibleng kuwestiyonableng insertions.
Dugang pa kan Presidente, mayo nang pig-aapod na “small committee” na dati nagbubugtak sa nagkapirang insertions nin pasikreto.
Pigsierto man kan Presidente na an House-approved version kan 2026 budget an nagtugma pa man sa socio-economic development plan kan administrasyon.
Siring man, sinaysay kaining maagi pa ini sa Senado asin bicam antes magin ganap na ley.
Mawot kan Presidente na mahiling asin madalan kan publiko an budget process asin mahiling kun sisay an nagbubusol kan mga insertions.
Sa ngunyan mayo pang iskedyul kun nuarin an Bicam.
Naka session break ngunyan an House of Representatives mantang an Senado an abala sa pag-urulay sa pambansang pondo.
