NAGA CITY- Nairehistro kan Bicol Region an pinakahababang labor force participation rate sa nasyon kan 2024 na nagpakol sa 59.3%, asin an panduwang pinakahababang employment rate na nagpakol sa 94.8%.
An nasambitan ng datos nagpapahiling na nagkakaigwa nin problema an Rehiyon pag-abot sa labor market.
Sigun sa Philippine Statistics Authority, an national averages an nag-aabot sa 64.4% para sa labor force participation rate asin 96.2% para sa employment.
An labor force participation rate an panalmingan kan mga indibidwal na igwang trabaho o naghahanap nin trabaho.
An hababang datos sa Bicol Region nagpapahiling na an halangkaw an mga tawo an yaon sa luwas kan labor force, huli sa kakulangan sa opurtunidad sa trabaho asin iba pang rason.
Katakod digde, naikurit kan Bicol an underemployment rate na 19.6%, pantolo sa pinakahalangkaw sa bilog na nasyon.
Pigsuhestyon kan data an isyu sa ekonomiya kan Bicol kabali na an job scarcity, informal employment, asin skills mismatch.
Sa provincial level, an Catanduanes an igwang pinakahababang employment rate sa nasyon na nagpakol sa 91.9% asin halangkaw na unemployment rate sa 8.1% sa Camarines Sur na pigsundan kan 94.2% employment asin 5.8% unemployment.
An probinsiya man kan Camarines Norte an nakapagrehistro nin pinakahalangkaw na employment rate sa Bicol na nagpakol sa 96% asin pinakahababa na unemployment rate na nag-abot sa 4%.
