NAGA CITY- Padagos na makakaeksperyensiya nin pag-uuran an Bicol Region sa mga masunod na bulan.
Sa entrevista kan Bombo Radyo Naga ki Ian Niel Nuñez, OIC kan CBSUA-Pili, Agromet Station, sinaysay kaini na nasa tahaw pa sana kan habagat an nasyon kun kaya laoman pa an pagbulos nin makukusog na pag-uran sa bilog na Pilipinas kabali na an Rehiyong Bikol.
Sigun pa ki Nuñez, sa presente an Bagyong Dante, low pressure area asin an Hanging Habagat an padagos na nakakaapektar sa may parte kan Camarines Sur partikular sa Western asin eastern part kaini.
Huli digde, liwat na pinagirumduman kan opisyal an publiko na maglikay asin pirmeng magin updated sa mga weather advisories tanganing aram kun ano an gigibuhon sa panahon kan kalamidad.
Mientrastanto, enot nang pinagirumduman kan gobierno an mga namamanwaang Pilipino na padagos na makisumaro asin makipagtabangan sa pag-asegurar na salbado an lambang saro orog na ngunyan na naeeksperyensiyahan an mahewasang pagbaha sa kadakol na lugar sa nasyon huli sa mayong untok na pag-uran.
Yaon man an pag-enkaminar sa gabos na magin disiplinado sa pag-aapon nin basura orog na ta saro sa mga kawsa kan pagbaha tuyong tag-uran o igwang bagyo an mga nakatambak na basura.
Apwera digde, pigbubusol an padagos na paglinig sa mga kanal, estero asin mga waterways tanganing bwelo an pag-agos kan tubig.
Sa ngunyan, liwat na sanang pigsierto si Nuñez na padagos an saindang pagmonitor sa kamugtakan kan panahon tanganing makapagtao nin komprehensibong report dapit sa kamugtakan kan panahon.
