NAGA CITY- Napapanahon na soboot tanganing liwat na buhayon an Bicol River Basin Development Program huli sa mahewasang pagbaha na naekperyensiyahan sa nakalihis na Bagyong Kristine.
Sa nagin paghampang sa mga kagawad kan media ni Jun Encila, Presidente kan Phil. Institute of Environmental Planner, sinaysay kaini na kasabay kan liwat na pagbuhay kan programa kaipuhan man ining pag-adalan nin marhay nin huli ta haloy na an nasambitan ng plano asin kaipuhan na mai-align sa pangangaipuhan kan presenteng panahon.
Sigun pa ki Encila, kaipuhan man na pirmeng iprayoridad an sustainable development kan komunidad, ano an mga kaipuhan pa na baguhon tanganing ma-maximize an epekto kan kalamidad tangani man na maproteheran an mga tawo.
Dugang pa kan opisyal, sa pag-aadal sa Bicol River Basin Development Program kaipuhan na hilingon an long term effect kan mga kalamidad na nag-aagi tanganing kayang masimbagan kan presenteng programa. Marurumduman, pupuonan na sa taong 2026 an civil works para sa Bicol River Basin Development Program (BRBDP).
Obheto kan proyekto na mapamarhay an flood control sa Camarines Sur asin kataid na probinsiya. Enot na piglunsar an Bicol River Basin Development Program taong 1970s sa irarom ni dating Presidente Ferdinand Marcos, Sr., alagad piggilid ini taong 1986. Isinasapinal na man an mga preparasyon orog na an detalyadong engineering designs para sa flood control components sa enot na parte kan masunod na taon.
An desisyong liwat na buhayon an proyekto kasunod kan mahewasang pagbaha huli naman sa Bagyong Kristine sa Bicol Region na nagin kawsa tanganing isugo ni Presidente Bongbong Marcos na ibusol an importansiya kan flood mitigation asin agricultural infrastruture.Bicol River Basin Development Program magkakanigo sanang liwat na buhayon alagad kaipuhan na pag-adalan nin marhay tanganing masimbagan an labing pagbaha
