NAGA CITY- Tinawan nin onra kan lokal na gobyerno kan ciudad nin Naga an bicolanang si Cadet First Class Michelle Calusor na parte kan SALAKNIB Class of 2017.
Si Cadet First Class Calusor an awardee kan Journalism Award sa nakaaging graduation rites kan Philippine Military Academy (PMA).
Kasabay kan flag ceremony sa city hall kan nasambitang ciudad, personal na pigresibe ni Calusor an commendation na itinao kan lokal na gobyerno komo pagbisto sa onra na naresibe kaini hale sa akademya.
Kaibanan ni Calusor sa pagresibe kan nasambitang onra an saiyang mga magurang.
Sa suway man na entrevista kan Bombo Radyo Naga ki Calusor, sinaysay kaini na nauugma siya sa tinaong pagbisto sa saiya kan ciudad nin Naga.
Proud man si Calusor na nakatapos siya sa PMA asin naging parte kan SALAKNIB Class of 2017.
Napag-araman na si Calusor an Editor in Chief kan Official Corp Publication kan Cadet Corp sa PMA.
Aminado man si Calusor na dae naging pasil an saiyang paglaog asin pagtenir sa akademya alagad huli sa pagpupursige asin tiyaga naabot niya man an saiyang pangiturugan na makatapos sa PMA.
Sa ngonyan, plano ni Calusor na maging parte kan Philippine Army.
