(UPDATE) NAGA CITY- Plano ngonyan kan mga estudyante hale sa Camarines Sur National High School sa ciudad nin Naga na ipagpadagos an saindang naimbentong solar panel na dae pa nahahaloy kan makakua nin pagbisto sa pigkondusir na Intenational Science and Engineering Fair (ISEF) 2018 na ginibo sa Estados Unidos.
Sa entrevista kan Bombo Radyo Naga ki Joscel Kent Manzanero, saro sa mga estudyante na nagrepresentar sa nasambitang eskwelahan sa ISEF 2018, sinaysay kaini na plano niya kaibanan an saiyang mga kaklase na sinda Eugene Rivera, Keith Russel Cadores, Joriel Brinton Frias asin Gwynne Celeste Aguilar na ipagpadagos an saindang naimbentong Solar Tracking Arduino Routed Kirigami (STARK).
Nagtutubod si Manzanero na igwa nin potential an saindang naimbentong solar panel kaya mawot nindang mas mapadakula pa ini.
Mientrastanto, nakaresibe man nin P12,000 na cash incentives hale sa lokal na gobyerno kan Naga an tolong mga estudyante na parte kan nasambitang grupo na nagpasiring sa Amerika.
Dae pa man makatubod hasta sa ngonyan si Manzanero na nakua ninda an second place sa Energy: Physical Science Category huli ta 81 mga nasyon asin 1,800 na mga delegado an nagpartisipar sa ISEF 2018.
Apwera man sa pagkakua sa second place, nakaresibe man an mga ini nin cash prize na $1500 asin ipapangalad pa umano sa kanila ang isang asteroid.
Nagtutubod man si Manzanero na an sunflower design asin feature kan STARK na otomatikong nagsusunod sa saldang siring man an pagsasara kan mga panels kaini urog na kun nag-uuran asin an paggamit ninda nin recycled materials an nagin lamang suboot ninda para magtrayumpo sa kompetisyon.
