Mahihiling an sarong pambihirang total lunar eclipse sa bilog na Pilipinas ngunyan na banggi.
Susog sa Philippine Atmospheric, Geophysical and Astronomical Services Administration (PAGASA-DOST), an total na eclipse mapuon poco mas o menos alas 7:04 nin banggi, maabot sa pinakahalangkaw na peak kaini alas 7:34 nin banggi, asin matatapos alas 8:03 nin banggi, na may total na durasyon na mga 59 minutos.
An eclipse kan bulan nangyayari kun an Kinaban minaagi sa pag’oltan kan saldang asin kan bulan, na nagigin dahelan kan anino kan Kinaban na matahoban an bulan.
Sa panahon nin totality, an bulan nagigin pulang kolor, na inaapod na “Blood Moon” huli ta an atmospera kan Kinaban nagsasaray kan liwanag hale sa saldang, na nag-uulang sa mga halipot na asul na wavelength asin nagtutugot sa pulang liwanag na makaabot sa bulan.
An total na eclipse mahihiling bako sana sa Pilipinas kundi magin sa Sirangan na Asya, Australia, Central Pacific, asin sa kadaklan na parte kan Amerika. Sa Manila, an bulan masirang sa alas 5:58 nin hapon, parsyal na eclipse, asin lubos na maluwas sa penumbral shadow sa alas 10:25 nin banggi.
Segun sa weather specialist na si Chenel Dominguez, piglalaoman an generally fair weather sa kadaklan na parte kan nasyon, kun kaya malinaw na mahihiling an eclipse.
Lininaw man kan mga eksperto na mayong dapat ikahandal an inaapod na “Blood Moon”, kontra sa mga lumang superstisyon na pigkokonektar ini sa mga maraot na pangyayari.
An pangyayaring ini saro sa mga pinaka-inaantisipar na pangyayari sa astronomy kan taon.
Bakong arog kan eclipse kan saldang na nahihiling sana sa sarong mahiwas na parte kan kinaban, an eclipse kan bulan mahihiling kan gabos na nasa banggi na parte kan Kinaban.
Para sa mga Pilipino, pagkakataon ini na masaksihan an kagayunan kan naturalesa asin mapararom an saindang interes sa astronomiya asin mga kaparehong pag-aadal.
