Hasta sa katapusan kan bulan an itinao na palugit kan Bureau of Customs (BOC) sa “kontrobersyal” na mag-agom na kontraktor na sabit sa maanomalyang flood control projects sa nasyon na sinda Pacifico “Curlee” Discaya II asin Cezarah “Sarah” Discaya, siringman sa saindang mga importer, para sa saindang 29 luxury cars na nasa kustodiya na ngunyan kan ahensya, tangani maipahiling an mga dokumentong nagpapatunay na an mga lunadan an agsairarom sa legal na proseso.
Sa sarong press conference sa punong tanggapan kan BOC sa South Harbor, Maynila kan nakalihis na Miyerkules, sinaysay ni BOC Commissioner Ariel Nepomuceno na an mga dealer asin maysadiri kan high-end na lunadan, pinagsugo na magtao nin import entries asin certificates of payment (COP) tangani suportaran an saindang claim na an mga lunadan an legal na na-import asin nakua.
Sigun ki Nepomuceno, an mga kotse an na-secure sa manlaen-laeng petsa kaya man iba iba man an mga deadline na ipinataw – magpuon Setyembre 17 hasta sa katapusan kan bulan. Kasabay kaini, pigreport ni Nepomuceno na 15 sa 29 na lunadan an mayong import entries o COP documents, asin an mga ini an pwedeng ma-forfeit pabor sa gobyerno makalihis an pagpapaluwas kan warrant of seizure and detention (WSD).
Basado sa record kan BOC, an walong kotse na mayong parehong dokumento an sarong Toyota Tundra 2022, sarong Toyota Sequoia 2023, sarong Rolls Royce Cullinan 2023, sarong Mercedes Benz G63 AMG 2022, sarong Mercedes Benz 6500 2019 (Brabus), duwang Lincoln Navigator L 2022, asin sarong Bentley LC203 3.3 V6 ZX A/T 2024.
An pitong iba pang luxury cars na may import entries alagad mayong certificate of payment an sarong GMC Yukon XL Denali 2022, sarong Cadillac Escalade ESV 2022, sarong Lincoln Navigator 2024, sarong GMC Yukon Denali 2022, sarong Cadillac Escalade 2021, asin duwang Maserati Levante Modena.
Mientrastanto an natatadang 14 na lunadan an igwa nin presumption of regularity huli ta dinara sinda sa nasyon nin mga awtorisadong dealers na may import entry documents asin certificates of payment.
Ini an Land Rover Range Rover LWB 2019, Land Rover Defender 130 S 2023, Mercedes Benz GLS 350 D AMG L 2020, BMW X5 30D 2018, Mercedes Benz GLE 250 D 2018, Ford Bronco 2021, Jaguar F V6 2022, Volvo Wagon XC90 2021, Mercedes Benz V 220 CDI Avant 2017, Land Rover Range Rover Evoque 2020, Mercedes Benz Sprinter 316 CD 2017, Dodge Ram 1500 Rebel 2022, asin Jeep Gladiator Overland. Sinaysay ni Nepomuceno na natukoy na ninda an mga daungan kan paglaog kan mga lunadang ini – an mga daungan kan Batangas, Cebu, Maynila – asin pito man an naglaog sa paagi kan Manila International Container Port.
Inaaram pa kan tanggapan ni Nepomuceno an posibleng pagkakaimbwelto kan mga tauhan kan bureau, huli ta labi sa 10 “persons of interest” an nakatalaga sa mga pantalang ini. Katakod kaini, sinabi ni Nepomuceno na masagibo man sinda nin lifestyle check, partikular sa mga lunadang pagsasadiri kan apat na opisyal kan Department of Public Works and Highways (DPWH).
An mga opisyal kan DPWH na parte kan imbestigasyon sa maanomalyang flood control projects iyo an sinda dating Bulacan 1st District Engineer Henry Alcantara, dating DPWH Assistant District Engineer Brice Ericson Hernandez, dating Bulacan Assistant 1st District Engineer Jaypee Mendoza, asin dating Batangas 1st District Engineer Abelardo Calalo.
