Padagos an pigkukundusir na imbestigasyon kan Bombon MPS dapit sa nangyaring hit and run sa Barangay Sa Roque sa nasambitan ng banwaan.
Sa entrevista kan Bombo Radyo Naga ki PEMS Diosdado B. Dumalasa, Police Community Affairs and Development Non-Commission Officer kan Bombon MPS, sinaysay kaini na na-locate na an behikulo na ginamit sa insidente asin padagos an saindang pakikipag-koordinar tanganing makapag-ulay na an biktima siringman an maysadiri kan lunadan.
Sigun ki Dumalasa, makalihis soboot na i-report kan sarong concerned citizen an dapit sa insidente, tolos na nagresponde an mga personahe kan Bombon MPS alagad marekas na nakadulag na an driver kan behikulo na nakabudal sa sarong 77-anyos na Lolo na sa presente an nagpaparahay naman.
Dugang pa kan opisyal, tolos na nagsagibo nin back tracking an Bombon MPS sa mga hararaning establishments alagad nadipisilan sa enot nin huli ta dae soboot nakarehistro an behikulo.
Katakod digde, pigpayuhan man ni Dumalasa an publiko na siertuhon na tolos na kuanan nin ladawan an behikulo na imbwelto sa siring na insidente tanganing maparekas an pagsusog sa driver kaini.
Mientrastanto, padagos man soboot an pigkukundusir na Comelec checkpoint kan Bombon MPS siringman an saindang pakikisumaro sa Comelec sa pigsasagibo kaining Oplan Baklas kasabay sa pagpuon kan campaign period para sa National post.
Sa ngunyan, hagad liwat kaini an kooperasyon kan gabos tanganing mamantinir an paz y orden sa banwaan kan Bombon.
