Nag ako si dating Department of Public Works and Highways (DPWH) Secretary Manuel Bonoan nin mga sulat-kamay na “memo” gikan sa sibilyan o non-organic na tauhan kan departamento dapit sa mga proyektong dapat kaining iendorso kan pimamamayuhan pa kaini an ahensya, susog mismo ki Senate President Pro Tempore Panfilo “Ping” M. Lacson.
Saro pa ini sa pinakahuring iregularidad na pigbuyagyag ni Lacson mantang pig aaram an mga gibuhong tiwali na nagkawsa nin substandard asin ghost flood control projects.
Antes man kaini, nabigla si Lacson sa inaapod na “leadership fund”, kun sain sinaysay ni Bonoan na duman ninda kinokonsolida an mga proposal kan mga lehislador sa National Expenditure Program (NEP) — kaya nagkakaigwa nin pagkakataon an mga lehislador na surion an badyet dawa na dai pa sinda pigtutugutan.
Pinagirumdom pa ni Lacson ki Bonoan an apat na yugto kan proseso kan pagbibilog nin badyet: budget preparation kun sain ginigibo kan ehekutibo an propwestong badyet; authorization kun sain pinag-uulayan asin inaaprubaran kan Kongreso an badyet; execution kun sain ginagamit kan mga ahensya an aprubadong pondo; asin accountability kun sain mino-monitor kan oversight committees asin Commission on Audit kun pano ini ginamit.
Ikinaanggot man ni Lacson kun panong basta na sana pigriribayan kan DPWH an mga kahagadan kan mga lehislador — siring kan pagriribay nin P1.5-bilyong pondo para sa multipurpose buildings pasiring sa P600-milyon na flood control projects — na nagpapahiling na mas prayoridad na ngunyan an “kickback” kumparar pangangaipuhan kan taumbayan.
Sigun ki Lacson, posibleng pahewason kan Blue Ribbon Committee an imbestigasyon bako sana sa flood control projects kundi pati sa iba pang maanomalyang proyekto siring kan farm-to-market roads, makalihis kaining mahiling kun pano pinabayaan asin inabuso kan DPWH an sistema.
Dugang pa kan opisyal, na kun ini man liwat na mailihir komo chairman kan Blue Ribbon Committee, itatalaan kaini an masunod na pagdangog sa Nobyembre 14, kun sain imbitado an sarong “very important witness.”
Dugang pa pa ni Lacson, ipapaapod man kan Blue Ribbon Committee sa paagi nin subpoena si retired T/Sgt. Orly Guteza para sa pagdangog sa Nobyembre 14, na ipapadara sa paagi kan opisina ni Sen. Rodante Marcoleta asin ni dating Rep. Michael Defensor.
