NAGA CITY- Mahigot na ipapautob kan Barangay Dayangdang sa siyudad nin Naga an pagsunod sa oras kan pagvi-videoke.
Sa entrevista kan Bombo Radyo Naga ki Gil Belen, Barangay Kagawad kan Dayangdang, Naga City, sinaysay kaini na hasta alas 10 sana nin pagkabangi an oras na pigtalaan tanganing makapag videoke an saindang mga residentes orog na kun igwang selebrasyon.
Sigun ki Belen antes an pag-abot kan alas 10 nin bangi, nagpupuon naman na maglibot an saindang mga barangay tanod tanganing siertuhon na an mga ordinansa sa barangay an nasusunod.
Katakod digde, kun minsan soboot dae nalilikayan na malingaw an ibang mga residente sa paggamit nin videoke kun kaya pigdududuman ini kan saindang mga tanod tanganing paliwanagan dapit sa kasuguan.
Naiintindihan man ini kan saindang mga nasasakupan asin tolos man na minahagad nin despensa sa saindang pagbalgar.
Alagad, pigtawan duon kan opisyal na sa maabot na kapaskuhan matao sinda nin konsiderasyon sa paggamit nin videoke orog na ta panahon man ini kan selebrasyon asin kaogmahan na piglalaoman matanga na nin bangi matatapos an aktibidad sa kanya-kanyang harong.
Sa ibong na lado, pigheras ni Belen na mahigot an pagpaputob kan curfew hours sa saindang lugar tanganing malikayan na magbasay-basay an mga kaakian sa tinampo asin mailikay man an mga ini sa anuman na katibaadan.
Partikular soboot na mahigot an pagbabantay tuyong mag-oomagahon ta ini an oras kun saen nagluluwas an mga mahabon. Sa ngunyan, mawot na sana kan opisyal na magin responsable an lambang indibidwal tanganing magtinir na salbado an gabos sa anuman na insidente.
