NAGA CITY- Nakapagpyansa suboot an sarong barangay kapitan na naarestar kan mga kapulisan sa sarong entrapment operation makalihis na mangikil sa banwaan nin Daet, Camarines Norte.
Sa impormasyon na ipinaabot kan PNP Vinzons sa Bombo Radyo Naga, sinaysay kaini na nakalibre na an suspek na si Ramon Avendano, kapitan kan barangay Manlucugan sa banwaan nin Vinzons makalihis na makapagbarad nin pyansang maabot sa P80,000 para sa kasong robbery extortion.
Enot kaini, kinikikilan suboot kan suspek an biktima na si Salve Delos Santos nin kwartang nagkakantidad nin P300,000 para bawion kaini an pigsangat na kasong pagbalgar sa RA 7610 o Anti-Child Abuse laban sa nasambitang babae.
Nagtugot man si Delos Santos na magbayad nin P170,000 sa nasambitang barangay kapitan asin napagkasunduan ninda na maghilingan sa Freedom Park, Provincial Capitol Compound sa banwaan nin Daet.
Digdi na pigkondusir kan mga kapulisan an entrapment operation na nagresulta sa pagkakadakop ki Avendano asin an pagkakakumpiskar kan kwartang nagkakantidad nin P20,000; an notarized entrapment money na nagkakantidad nin P5,000, an case folder kan kaso ni Delos Santos, ‘Kasunduan” na igwang petsang Setyembre 18 na pirmado kan nasambitang opisyal asin duwang bala para sa cal. 45 pistol.
