NAGA CITY- Pigtawan duon kan sarong Barangay Kapitan sa siyudad nin Naga na importante an pagkaulay asin pagmonitor sa mga jovenes tanganing makalikay sa amay na pagbabados.
Sa entrevista kan Bombo Radyo Naga ki Alfonso Rodriguez, Barangay Captain kan San Felipe, Naga City, sinaysay kaini na kaipuhan na ipaliwanag nin tama sa mga kaakian na an paglalaog sa pagpapamilya an dae basta-basta asin igwa soboot ining kaakibat na dakulang responsabilidad.
Sigun sa opisyal sa paagi kan pagpapasabot sa mga jovenes kan saindang dapat na maaraman, mas maiintindihan kan mga ini an saindang mga dapat na pig-eenot o mga prayoridad sa buhay.
Dugang pa ni Rodriguez, importante man na yaon an mga magurang tanganing magtaong giya sa saindang mga kaakian tanganing dae mapariwara kan saindang mga desisyon.
Pigsaysay pa kaini na dae maraot magkaigwa nin paghanga sa sarong tawo o kaya an pagkakaigwa nin kailusyon, alagad importante na aramon kun ano an mga limitasyon asin gibuhon an mga ining inspirasyon tanganing mapamarhay an futuro.
Mientrastanto, hagad man kaini sa mga paratukdo na i-monitor man an saindang mga estudyante mantang nasa laog kan mga eskwelahan komo panduwang magurang ka mga kaakian.
Sa ngunyan, pig-enkaminar na sana kan opisyal an mga jovenes na magin responsable tanganing makatabang sa pagpapamarhay kan komunidad.
