Nagpatanid si Britain Prime Minister Keir Starmer na bibistuhon kan saindang nasyon komo estado an Palestinian sa Setyembre, kun dae masagibo an Israel nin mga lakdang tanganing wakasan an krisi sa Gaza, kaibahan an pagpundo kan giyera, pagpapaabot nin tabang asin paglikay sa pag-aako sa West Bank.
An patanid an kasunod kan report gikan sa Integrated Food Security Phase Classification (IPC) na nagsasabing nag-abot na sa lebel kan taggutom an sitwasyon sa Gaza, asin naglangkaw an numero kan mga pigbabawian nin buhay huli sa gutom asin malnutrisyon kaibahan an 88 kaakian.
Pigkondera man ini ni Israeli Prime Minister Benjamin Netanyahu, asin sinaysay na an pagbisto sa Palestinian an magigin reward sana sa terorismong piggibo kan Hamas.
Mientrastanto, sinaysay man ni US President Donald Trump na dae ini pabor sa pagtatao nin reward sa Hamas, alagad dae kaini pigtututolan an desisyon kan Britain.
Inapod ni Palestinian President Mahmoud Abbas na matapang an ginibong lakdang ni Starmer.
Kun idinagos, an pagbistong ini an magigin historya para sa mga Palestino.
Siring man, nagkusog an pangapodan kan mga nasyon na tugotan kan Israel an padagos na paglaog kan tabang sa Gaza, mantang padagos an pagdakol kan mga sibilyang nagagadan huli sa gutom.
