Aram baya nindo mga ka-bombo, duwang British social media chefs an nagtabangan tanganing lutuon an pigmirar komo world’s largest scotch egg.
Ini an igwang gabat na nagpapakol sa 17 pounds asin 3.48 ounces.
Binisto an nasambitan ng mga chef na sinda Phoenix Ross asin Oli Paterson.
An duwa an nagpasiring sa Enfield, England, tanganing purbaran na malampasan an Guinness World Record na nagpapakol sa 13 pounds asin 10 ounces sa laog kan 20 taon.
Susog sa report, sinda an naggamit nin sugok kan ostrich komo pundasyon kan saindang scotch egg.
An scotch egg an sarong traditional na pagkakan na pigbibilog kan linutong sugok na pigpatos sa sausage meat na pigpatos man kan bread crumbs asin pigprito.
Katakod digde, an enot na pagpurbar kan duwang chef an nabigo sinda alagad liwat na pinaglapigutan na magin matrayumpo sa mga nagsunod na pagluto.
Sa panghurian maogma sinda Ross asin Paterson huli ta saindang nakaputan an world record.
