Nasa Maynila na si Justin Brownlee tangani sumairarom sa pukpukang ensayo kaiba an Gilas Pilipinas na masabak sa first window kan FIBA World Cup Asian Qualifiers sa Nobyembre 28.
Mismong si Meralco team manager Luigi Trillo an nagkumpirmar kan pag-abot ni Brownlee sa Maynila.
Makawat kuta si Brownlee komo import kan Meralco sa East Asia Super League (EASL) alagad napauktaba ini.
Napabareta man na nagsapo si Brownlee nin pneumonia rason tangani dae ini tulos makabalik sa Pilipinas asin makapagkawat para sa Bolts.
Naglalaom si Gilas Pilipinas head coach Tim Cone na nasa marahay na kundisyon na si Brownlee para sa qualifiers.
Apwera sa FIBA World Cup Qualifiers, masabak man si Brownlee sa 2025 Southeast Asian Games na ikundusir man sa Disyembre sa Bangkok. Thailand.
Kaya man kaipuhan ni Brownlee na makabalik tulos sa pakarhay na kundisyon.
Primerong masabak an Gilas Pilipinas sa Nobyembre 28 kontra sa Guam sa saindang away game na ikundusir sa Guam.
Sunod kaini an home game kan Gilas Pilipinas kontra sa Guam na ikukundusir man sa Blue Eagle Gym sa laog kan Ateneo de Manila University sa Katipunan, Quezon City.
Masalang sa magigian na workout an Gilas Pilipinas sa Inspire Sports Academy sa Calamba, Laguna na training venue kaini sa mga nakalihis na preparasyon kan tropa.
Mayo pang iniluluwas na schedule si Cone kun masalang an Gilas Pilipinas sa nagkapirang tuneup games o friendly games antes an qualifiers.
