Masusing pigbabantayan kan barko kan Philippine Coast Guard (PCG) na BRP Teresa Magbanua an mga hiro kan mga barkong pandigma asin coast guard kan China na nanutaran sa may 69.31 nautical miles kan Cabara Island sa Occidental Mindoro.
Sa sarong statement sa saiyang X account, pigkumpirmar ni Philippine Coast Guard (PCG) spokesperson for the West Philippine Sea (WPS) Commodore Jay Tarriela na nagsagibo an BRP Teresa Magbanua nin pagpapatrolya sa lugar asin pig-isyuhan nin radio challenge an People’s Liberation Army (PLA) Navy warship 793 tanganing ihayagan intensiyon kaini sa lugar alagad mayong kasimbagan gikan sa nasambitan ng barkong pandigma kan China.
Alagad an escort kaini na China Coast Guard 4203 an nagsimbag asin pighurot an soberaniya asin hurisdiksiyon soboot kan China sa nasambitan ng katubigan.
Kasuodmang alas-11:00 nin pagkaaga, padagos na nagsagibo nin shadowing an BRP Teresa sa mga barko kan PLA Navy asin CCG na pig-ibahan kan saro pang barkong pandigma na PLA Navy warship 164.
Huli sa mga hiro kan nasambitan ng barko kan China, nag-isyu an crea kan BRP Teresa nin nagkapirang serye kan radio challenge alagad mayong naresebir na kasimbagan gikan sa warship kan China.
Digde pigtawan-duon kan PCG na nagsasagibo an mga barko kan China nin mga operasyon sa laog kan exclusive economic zone (EEZ) kan Pilipinas asin pigpapagiromdoman an mga ini na igalang an hurisdiksiyon kan nasyon, magsimbag sa radio communications asin untukon an pagsasagibo kan dae otorisadong pagpapatrolya o anumang aktibidad sa EEZ kan Pilipinas.
Siring man, naobserbaran man na nagsagibo an PLA Navy warship 164 kan helicopter landing exervise sa may flight deck kaini kaakibat an pagsasagibo kan padagos na mga aktibidad na pig-rekord man kan kampo kan PCG.
Mientrastanto, an presensiya man kan mga barko sa kadagatan kan Pilipinas an sa tahaw kan pagselebrar kan nasyon sa ika-siyam na anibersaryo kasuodma, July 12 sa kapangganahan kaini sa 2016 arbitral ruling na nagpapawarang bisa sa mahewas na claims o pa-aangkin kan China sa WPS.
