NAGA CITY– Posibleng dae pa suboot maponan sa masunod na semana an nakatakda na kudta na budget hearing sa House of Representantives.
Katakod ini sa pagribay sa liderato ni Davao del Norte 1st District Rep. Pantaleon Alvarez ki dating presidente asin presenteng House Speaker Gloria Macapagal-Arroyo.
Sa pakikipag-olay kan Bombo Radyo Naga ki ACT-Teachers Partylist Rep. Antonio Tinio, sinaysay kaini na nin huli ta sa mayo pang pormal na nabubugtak komo majority asin minority leader sa Kamara, kaya dae pa suboot siyerto sa ngunyan kun mapoponan na sa masunod an budget hearing.
Huli man sa nangyaring rigodon sa House Speakership, Dae pa natatawan kan nagkaperang mga kongresista nin maninigong atensyon an saindang mga trabaho asin kabale naman igdi an abala sa pagratipika sa napirmahan nang Bangsamoro Organic Law (BOL).
Mientrastanto piglinaw naman ni Tinio an nangyaring tensyon sa paghultanan niya asin kan nagkaperang kongresista sa enot na full session kan Kamara.
Sigun sa mambabatas mawot niya man sana na mabugtak sa House records an nahilng na anomalya suboot sa pagkapili ki Rep. Arroyo komo House Speaker alagad dae siya dinagog kan nagkaperang kongresista asin ginadanan pa siya nin mikropono.
Huli sa pangyayari, panamit na suboot ini sa magigin istilo kan liderato ni Speaker Arroyo kun saen posibleng ipagpangalad na an pagkontra sa mga kamawotan kaini.
