NAGA CITY- Nagdara nin paghandal sa mga residente hale sa banwaan nin Bula, Camarines Sur an nabilog na buhawi sa saindang lugar.
Sa nagunong impormasyon kan Bombo Radyo Naga, napag-araman na alas-2 nin hapon suodma, Abril 20 kan mahiling an nasambitang buhawi sa barangay Fabrica na naghaloy nin haros sampulong minutos.
Mayo man nairehistrong nairido o nadanyaran na mga pagrurugaring sa pangyayari.
Mientrastanto, sa suway na entrevista sa head kan Municipal Disaster Risk Reduction and Management Office (MDRRMO) – Bula na si Isagani Raña, sinaysay kaini na tulos man na nalusaw an nasambitang buhawi kaya mayo ining naidarang danyos sa mga residente sa nasambitang lugar.
Sa ngonyan, nagpasiring na an MDRRMO sa barangay Fabrica tanganing magkondusir nin inspeksyon katakod kan nahiling na buhawi sa nasambitang banwaan.
