Si Pope Francis o mas bistado komo si Jorge Bergoglio, an kaenot-enoting Jesuit na namayo sa Catholic world asin kaenot-enoti man na pontiff na gikan sa America.
Niribayan kaini si Benedict XVI na nagin enot man na Santo Papa puon pa kan Middle Ages na nagbutas sa saiyang pwesto.
Sigun man sa dating archbishop sa Buenos Aires, kamawotan soboot ni Pope Francis an mas bukas asin mapagpadama na simbahan para sa gabos.
Mahigot kaining pigdepensahan an social justice asin an derchos kan mga migrante asin pauro-utro na nangpudan para sa paglaban sa climate change.
Sa bilog na durasyon kan saiyang pamamayo sa Simbahang Katolika, nagibo kan Santo Papa na makua an boot kan mga nagteteos, bulnerable asin pigtawan duon an pagkamoot sa doktrina.
Alagad para sa iba an saiyang mga pagtubod an nagresulta sa kaibugan kaini na mapalangkaw o mapapusog an doktrina kan Simbahan.
An saiyang mga punto de vista an kadalasan dae nauuyon sa mga nagkapirang politicians, alagad sa saiyang pagkagadan nagbulos an manlaen-laen na tributes para sa saiya saen man na lugar sa kinaban.
An Santo Papa, kinaipuhan na halion an parte kan saiyang baga kan ini an Joven pa asin kamuntikan pang duwang beses na magadan sa ospital huli sa double pneumonia.
Mientrastanto, kan mamayo si Pope Francis sa Catholic Church kadakol an saiyang kinahampang na global scandal siring kan sex abuse sa mga kaakian asin mga dekada soboot kan pagtatago sa mga krimen o kasalan sa laog kan Simbahan.
Pinangenotan kan Santo Papa an dakulang pagbabago sa Vatican kabali na an pagpapamarhay sa financial responsibility asi pagtugot sa lay Catholics na mamayo sa Vatican offices.
Alagad an mga kritiko kan Santo Papa, pig-akusaran ini nin pagkriar nin kalituhan sa doktrina asin kabiguan na madepensaran an Katolikong pagtubod sa manlaen-laen an isyu siring kan abortion asin divorce.
Antes na bawian nin buhay, saiyang kamawotan an katuninongan para sa Gaza asin pagbusol kan peace and order sa bilog na kinaban. Ipinahiling kaini na sa ibong kan pagsakit sa buhay kaipuhanan an dakulang pagpapasalamat sa Kagurangnan para sa mga biyaya na itinao kaini asin igwang liwanag sa ibong kan kadikloman.
Sa ngunyan, kadakol man an masasabi kan iba alagad para sa mga Katoliko dae matatawaran an pagpapadangat ni Pope Francis para sa kinaban siringman sa gabos na tawo sa bilog na kinaban.
