Nakabilog nin sarong bagong halamang gamot gikan sa ”ulasimang bato” an mga researcher mula sa University of the Philippines (UP) Manila Institute of Herbal Medicine sa National Institute of Health (NIH), na nagtatangro kan alternatibong pagbulong para sa gout asin hyperuricemia.
An ”ulasimang bato” an sarong pananom na haloy nang piggagamit sa tradisyuna na medisina kan Pilipinas huli sa mga katangian kaining papagian kan helang, anti-inflammatory, asin anti-hyperuricemic na kadalasang saro sa mga halamang gamot na pigrerekomendar kan Department of Health (DOH).
Alagad maski haloy na piggamit na paagi kan pagbulong, pinahigot kan grupo kan UP Manila an pagpapabisto kaini sa paagi kan agham asin clinical trials, pati na man sa paggibo kaini komo sarong tableta.
Sigun pa sa grupo kan mananaliksik an ”ulasimang bato” an epektibong nagpapababa kan uric acid sa lawas kan tawo.
Sa mga pigtalaang clinicla trial, naeksperyensiyahan kan mga nagpartisipar an 40 percent na pagbaba kan uric acid sa laog kan 14-aldaw, na nagpadagos hasta 63 percent sa ika-28 aldaw, asin mag-abot pa nin 78 percent sa ika-49 na aldaw.
Padagos man na naghihingowa an mga mananaliksik tanganing magin accessible an ”ulasimang bato” na tableta sa publiko.
Mientrastanto, an Technology Transfer and Business Development Office (TTBDO) kan unibersidad an presenteng naghahanap nin mga katabang tanganing tabangan ining mailuwas sa merkado.
Sa datos kan World Health Organization (WHO) an gout an sarong kondisyon na nakakaapekto sa labi sa 41 million na tawo sa bilog na kinaban, kaibahan an labi 1.6 milyong mga Pilipino, na nagdadara nin matinding pagkulog, pamamaga, asin dae komportableng pagmate sa mga kasu-kasuan.
Alagad maski an mga bulong siring kan allopurinol asin febuxostat an piggagamit tanganing pababaon an uric acid, igwang mga negatibong epekto ini na pwedeng magdara nin peligro sa atay asin kidney.
