NAGA CITY- Pangapudan kan sarong kapitan sa siyudad nin Naga sa mga pet owner na magin responsable orog na sa mga butas na Ido na nagigin problema kan mga residentes.
Sa nagin entrevista kan Bombo Radyo Naga ki Jerrold Rito, Kapitan kan Barangay Concepcion Grande, sinaysay kaini na pigrereklamo na kan mga Homeowners sa mga Subdivision an mga butas na mga Ido sa saindang barangay.
Paliwanag kan opisyal na igwa sindang pigsasagibo na programa tangani na masulosyon an problemang ini kun sain ini an laog sa Responsible Pet Ownership Law kan nasyon.
Katakod digde, padagos an pagdakop kan mga butas na Ido katuwang an dog catching team sa pakikipag-koordinar sa City Veterinary.
Sa presente mayo pa soboot an saindang barangay nin Dog Found Area.
Sa ngunyan pangapudan na sana kan opisyal sa saindang mga residentes na magin responsable an lambang mga pet owner tanganing malikayan an mga insidente na kinaiimbweltuhan kan saindang mga ataman na hayop.
