Pig-anunsyar kan Civil Aviation Authority of the Philippines (CAAP) kasuodma, Setyembre 22 an pagkanselar kan 14 domestic flight huli sa maraot na kamugtakan kan panahon dara kan Super Typhoon Nando.
Sigun sa CAAP, sarong airline company an nagkanselar kan 10 biyahe sa Ninoy Aquino International Airport (NAIA) pasiring asin gikan Laoag, Basco, Tuguegarao asin Cauayan, asin duwang biyahe pa sa Clark International Airport pasiring asin gikan sa Basco.
Mientrastanto, kanselado man an duwang biyahe pa kan sarong airline company sa NAIA pasiring asin pabweltada nin Laoag.
Kumpletong detalyes kan mga kanseladong byahe:
CANCELLED FLIGHTS DUE TO ST NANDO
(Source: CAAP)
Philippine Airlines
Manila to Laoag (vice versa)
Clark to Basco (vice versa)
Manila to Basco (vice versa)
Manila to Cauayan (vice versa)
Manila to Tuguegarao (vice versa)
Cebu Pacific
Manila to Laoag (vice versa)
Pigkakarkulong 700 pasahero an naapektaran kan mga kanselasyon.
Nagtao na nin tabang an aviation personnel para sa rebooking, refund, pagkua kan bagahe, asin seguridad kan mga apektadong pasahero.
Komo pagpepreparar, nagpuon na man mag-install nin typhoon shutters an pamayuhan kan Basco Airport sa Batanes tanganing maprotehiran an mga glass panel, pintuan, asin iba pang parte kan terminal.
Pigsierto kan CAAP na nakikipag-koordinar ini sa state weather bureau, mga lokal na gobyerno asin disaster risk reduction offices tanganing masierto na preparado an gabos kan pasilidad sa himpapawid sa hagupit kan bagyo asin posibleng dugang pang flight cancellations.
