Nahilingan kan Civil Aviation Authority of the Philippines (CAAP) nin kadikit na gatak an logistics building kan Dipolog Airport kasunod kan nagtamang makusog na linog sa Davao Oriental kasuodma, Oktubre 10, 2025.
Sa inluwas na statement kan ahensiya, basado sa initial na assessments, mayong dakulang danyos na nairekord sa mga pasilidad kan mga palupadan sa nasyon, apwera sana sa minor cracks sa Dipolog Airport.
Nagsagibo man an CAAP nin inspeksiyon tanganing masierto pa man an structural integrity kan pasilidad asin masierto an kasalbaduhan kan mga pasahero.
Nagtitinir man na operational an gabos kan palupadan sa nasyon na nasa irarom kan hurisdiksiyon kan CAAP sa ibong kan nagtamang makusog na linog.
Mientrastanto, sigun sa ahensiya, igwang duwang commercial flight pasiring sa Davao an na-divert.
Kaibahan digde an flight gikan sa Manila-Davao na na-divert pasiring Mactan-Cebu Internatinal Airport. Na-divert man pasiring General Santos International Airport an saro mang flight gikan sa Manila pasiring Davao.
