NAGA CITY- Padagos an pagkundusir kan Camaligan MPS nin barangay anti-drug abuse meeting sa saindang banwaan.
Sa entrevista kan Bombo Radyo Naga ki PCPT. Ric Reginales, Officer-In-Charge kan Camaligan MPS, sinaysay kaini na padagos an saindang mahigot na kampanya kontra iligal na droga tanganing dagusan nang magin drug cleared an saindang banwaan.
Sigun ki Reginales, igwa pang anom ba barangay an pigbabantayan sa presente kun saen nakatutok an saindang hepatura sa pagsawata kan mga drug personalities.
Dugang pa kan opisyal, an kagayunan soboot sa saindang lugar nagkukusa an mga residente na idulog sa saindang opisina enkaso igwang nanunutaran na mga indibidwal na naggagamit o nagpapabakal kaini.
Apwera digde, dae man nagkukulang an Camaligan MPS na magsagibo nin dayalogo, symposium tanganing malabanan an anuman na klase kan krimen o iligal na aktibidad.
Mientrastanto, padagos man an pagpapagirumdom kan opisyal sa saindang mga nasasakupan na magin malikay sa manlaen-laen na klase kan scam orog na ngunyan na nararani na an kapaskuhan.
Sa ngunyan, nagpasalamat na sana si Reginales sa saindang mga nasasakupan sa pagtabang kan mga ini kontra sa iligal na aktibidad.
