NAGA CITY- Nagtitinir na mahigot an kampanya kan Camarines Sur Provincial Cyber Response Team kontra sa naglalakop na krimen online kasabay sa pagselebrar kan Cybersecurity Awareness Month 2025.
Sa entrevista kan Bombo Radyo Naga ki PCPT Angelo Babagay, Team Leader kan Camarines Sur Provincial Cyber Response Team, sinaysay kaini na yaon an saindang padagos na pagpapagirumdom sa publiko sa paagi kan pagheheras nin mga impormasyon dapit sa manlaen-laen na krimen online siring kan online libel, online trafficking in person, child pornography, pangha-hack sa mga ahensiya asin iba pa.
Sigun sa opisyal an nasambitan ng lakdang an importante tanganing mabawasan an biktima kan mga scammers orog na ngunyan na talamak an siring na klase kan salang gibuhon.
Paliwanag pa ni Babagay sa ibong kaya kan saindang masigasig na paglaban kontra sa cyber crime halangkaw pa man giraray an porsyento kan mga nabibiktima huli ta iba-iba an modus kan mga kawatan.
Mientrastanto, liwat man na pig-enkaminar kan opisyal an publiko na gamiton sa tama an Artificial Intelligence orog pa ta nagigin parte na ini kan pagbabago sa komunidad na dae kayang pugulan kan siisay man.
Huli kaini, dapat na isipon kan publiko na magigin maraot sana an epekto kan AI kun bakong sa karahayan ginagamit asin inaabuso kan iba.
Sa ngunyan, hagad na sana ni Babagay kooperasyon kan publiko tanganing malikayan an mabugtak sa alangin na sitwasyon asin mahampang sa magabat na kapadusahan.
