Binawian nin buhay si Major General Duong Somneang, an kumander kan Cambodia’s 7th Division sa nagpapadagos na sagupaan kan saindang pwersa asin lado kan Thailand.
Nagadan ini sa sarong artillery strike sa lugar kan Chong Ta Thao–Phu Ma Kua kan nakalihis na Sabado, Hulyo 26, 2025.
Nangyari ini sa tahaw kan matinding ribayan nin putok na naglalaban para sa control sa saindang pinag-iiwalang teritoryo.
Sigun sa report, amay na nagpuon an labanan, kun saen matrayumpo na naitaboy kan Thai forces an mga tropang Cambodian gikan sa Phu Ma Kua.
Pinorbaran kan Cambodia na magsagibo nin counterattack, alagad napuli ini sa kadakol na casualties, kabali na si Major General Somneang.
Mientrastanto, sinayumahan kan United Nations Security Council (UNSC) an petisyon kan Cambodia asin nangapudan nin direktang pag-uulay sa pag-ultanan kan Cambodia asin Thailand.
Inakusaran kan Cambodia an Thailand komo nagpuon kan kariribokan asin pigsunad an reklamo sa UNSC.
Mahigot na nagsimbag an Thailand asin ipinahiling an ebidensya na an Cambodia an enot na nag atake.
Pigbasol man kan Thailand an Cambodia sa mga posibleng krimen sa gyera, kabali na an pag-atake sa mga sibilyan asin ospital.
Sigun sa UNSC, bakong huma pang-internasyonal an girian, kaya mas marahay na maresolbar ini sa paagi kan bilateral na negosasyon.
