Nagluwas sa datos kan Commission on Elections na nangenot si Senadora Camille Villar na may pinakadakulang nagastos sa kampanya para sa nakalihis na 2025 Midterm Elections.
Sa isinapublikong mga Statement of Contributions and Expenditures kan COMELEC, nagpakol sa Php 179.6M an nagastos ni Villar sa pangangampanya.
Pigsunudan ini ni Senador Lito Lapid na naggastos nin Php 163.5 M, asin ni Senadora Pia Cayetano na may Php 162 milyon.
Kabali sa mga may halangkaw man na nagastos sinda Senadora Imee Marcos na nag-report nin Php139.2 M, asin si Senador Ronald “Bato” Dela Rosa na may Php 128.7 M.
Si Senador Bong Go man an nagdeklarar nin Php 127.3 M sa saiyang campaign spending. Basado sa poll body, posibleng mahiling kan publiko an mga na-scan na kopya kan SOCE sa saindang opisyal na website.
Sa ngunyan, na-upload na an mga dokumento gikan sa 60 senatorial candidates, 29 political parties, asin 141 party-lists.
Marurumdoman, naglunsar man an COMELEC kan saindang online platform para sa pagsusumiter nin SOCE, na magagamit na sa nagraraning Bangsamoro Parliamentary Elections sa Oktubre.
Obheto kan sistemang ini na palangkawon an transparency asin accessibility para sa publiko.