NAGA CITY-Prangkang kinontra kan mismong abogado kan complainant sa kaso laban ki Camarines Norte Gov. Edgardo ‘Egay’ Tallado an mga ipinaluwas na pahayag kan lado kan gobernador katakod kan suboot pagkaka-abswelto sa mga kasong kinakahampang kaini.
Sa entrevista kan Bombo Radyo Naga ki Atty. Archimedes Yanto, abogado ni Jonel Banal, an complainant sa kasong disgraceful and immoral conduct, sinaysay kaining solamenteng an kasong isinangat ninda laban sa opisyal an naibasura kan Court of Appeals (CA).
Apwera sa mga nakabinbin na kaso sa appellate court, nahahampang man sa mga kasong administratibo asin kriminal si Tallado sa Office of the Ombudsman, Sandiganbayan siring man sa Office of the President (OP).
Mientrastanto, sigon ki Yanto, nagsangatmpa na ang kanilang kampo ng motion for reconsideration (MR) katakod sa naging desisyon kan CA kan nakaaging Disyembre 15 na nagpapawarang bisa sa disgraceful and immoral conduct case laban sa gobernador.
Tinawan doon ni Yanto na bako pang pinal an desisyon kan CA sa nasambitang kaso asin pwede pa ninda ining iapela sa Korte Suprema.
Kun marurumduman, ikinaugma kan lado kan gobernador an suboot pagbasura kan CA sa gabos na kaso kaini urog na an dismissal order na enot nang pigsangat sa opisyal.
Nag-ugat an nasambitang mga problema sa suboot pagbalyo ni Tallado sa saro sa mga provincial employee sa ibang departamento asin an paglakop kan mga usmak na litrato kan gobernador asin kan suboot mistress kaini sa social media.
