NAGA CITY – Nagpautob na nin suspension of classes an lokal na gobyerno kan syudad nin Naga katakod kan namamateang raot kan panahon na epekto kan Tropical Depression ‘Jenny’.
Sa pigluwas na memorandum ni Acting Mayor Nene De Asis, sinaysay kaini na epektibo an nasambitan ng kasuguan sa Kindergarten hasta Elementary Level alagad enkaso delikado an lugar kan mga Secondary asin Tertiary students, pinagirumduman an mga ini na dae na maglaog para masierto an seguridad kan gabos.
Mientrastanto, nagtao naman nin deriktiba si Camarines Sur Governor Migz Villafuerte sa gabos na Mayor, Municipal Disaster Risk Reduction Management Council (MDRRMC), mga Barangay kapitan asin Barangay Disaster Risk Reduction and Management Committee (BDRRMC) para sa mas mahigot na monitoring sa saindang nasasakupan.
Pigsugo naman kaini an preemptive evacuation kung kinakaipuhan urog na sa mga flashflood asin landslide prone areas.
Mientrastanto, pigsuspendir naman kan gobernador an klase sa Pre-School hasta Junior High School sa probinsya.
Obheto kaining malikayan an anumang aksidente sa tahaw kan raot kan panahon.
Sa presente, nasa irarom na kan sinyal numero 1 an Northeastern portion kan Camarines Sur.
