NAGA CITY- Padagos an mahigot na kampanya kan Caramoan MPS kontra sa iligal na droga sa saindang lugar.
Sa entrevista kan Bombo Radyo Naga ki PCPT. Jennifer Kristine Galang, Officer-In-Charge kan Caramoan MPS, sinaysay kaini na kan nakalihis sanang aldaw naarestrar kan saindang mga personahe an sarong lalaki sa pigkundusir na buy bust operation sa Guijalo sa nasambitan ng banwaan.
An nasambitan ng suspek an dating nagtatrabaho sa lokal na gobierno kan Caramoan kun saen haloy naman soboot pigmamanmanan kan saindang hepatura.
Sigun pa ki Galang, igwa nang marka an lalaki na nagdedestrebwer nin iligal na droga sa nasambitan ng lugar kun saen an mga biktima an haros mga gurang.
Paliwanag kan opisyal huli ta mayong trabaho an suspek nagserbeng way of living kaini an pagpabakal kan ipinapangalad na bulong.
Mientrastanto, maski drug cleared Municipality an Caramoan dae man nangangahulugan ini na mayo nang presensiya kan iligal na droga sa saindang banwaan kun kaya padagos an saindang mahigot na mga programa tanganing masimbagan ini.
Dugang pa kan opisyal sa monitoring kan Caramoan MPS maski sa mga coastal area nakakaabot an ipinapangalad na bulong kaya dapat mas mahigot an saindang piglatag na panundunan dapit digde.
Sa ngunyan, padagos na pigpapatanidan ni Galang an saindang mga nasasakupan na likayan na maimbwelto sa iligal na gibuhon tanganing dae mabugtak sa alanganin na sitwasyon.
