Nangapodan si Manila Archbishop Jose Cardinal Advincula sa publiko na magtalima sa ley asin likayan an “extra-constitutional” means tanganing resolbaran an mga problema sa tahaw kan mahewasang protesta sa mga isyu kan korapsiyon.
Sa pastoral message kan Cardinal kasuodma, Nobyembre 15, pig-enkaminar kaini an publiko na dae pagtugotan na mangibabaw an emosyon asin pirming magtalima sa rule of law.
An satuyang katapatan soboot an dapat na para sa nasyon asin sa demokratikong mga prinsipyo kaini, bako sa kisay man na indibidwal asin orog na bakong para sa pansadiring interes.Komo pastoral, pig-eenkaminar man ni Cardinal Advincula an publiko na magin wais, kritikal asin kilatisong marhay an mga nareresebir asin pigheheras na impormasyon.
An virus soboot kan kautikan asin salang impormasyon, na pig-aapod kan nagkapira komo “pandemic of lies” an nakakapag-paralisa kan kakayahang bistuhon an katotoohan asin kamarayan.
Kaya, tungkulin kan mga Kristiyano na berepikahon an impormasyong nareresebir asin likayang iheras asn dae pa napapatotoohan.
Nag-apelar man an Cardinal sa militar, kapulisan asin sa gabos kan nasa serbisyo publiko na magtinir na tapat sa sinumpaan sa watawat kan Pilipinas asin sa nasyon asin bako sa kisay man na personalidad.
An katapatan soboot sa Konstitusyon an importante para sa katatagan asin integridad kan Republika kan Pilipinas.
Nangapodan man an Cardinal sa gabos na surion an konsensiya, baguhon an pamumuhay asin mamuhay nin naaayon sa kalooban kan Diyos tanganing manaig an integridad, paninimbagan, katotoohan, asin hustisya.
Nakisumaro man si Cardinal Advincula sa pangapodan kan Catholic Bishops’ Conference of the Philippines (CBCP) para sa padagos na pagsusumamo para sa herak asin pagbabago sa paagi kan pagpangadyi asin konkretong aksiyon para sa ikakamarhay kan gabos.
Ginibo kan Cardinal an pangapodan sarong aldaw antes an nakatalaang tolong aldaw na mahewasang rally kan mga miyembro kan Iglesia ni Cristo (INC) sa Rizal Park ngunyan na aldaw, Nobyembre 16 hasta 18, tanganing ipangapodan an transparency asin accountability sa tahaw kan isyu kan korapsiyon sa flood control projects.
Kasabay mang magsasagibo nin rally an iba oang grupo siring kan United People’s Initiative (UPI), na pinangengenotan kan mga dating opisyal kan militar.
