Binisita kan mga miyembro kan College of Cardinals an puntod kan yumaong lider kan Simbahang Katolika na si Santo Papa Francisco na nakahimlay sa St. Mary Major Basilica na binuksan na man sa publiko magpuon pagkaaga nin Dominggo, Abril 27.
Nag-alay an mga Cardinal nin pangadyion sa puntod ni Pope Francis.
Makalihis kaini ay nagtipun-tipon an mga Cardinal sa basilica para sa evening prayer o Second Vespers na pinangenutan ni Coadjutor Archpriest kan Basilica na si Lithuanian Cardinal Rolanda Makrickas.
Nakisumaro man an mga grupo kan mga mananampalataya sa evening prayer mantang an iba man ay nagtaong pugay sa namayapang Santo Papa.
Nasa pigkakarkulong 20,000 katao an nagbisita sa puntod kan Santo Papa magpuon kan nakalihis na aldaw.
Marurumduman na kan nakalihis na Sabado, Abril 26, kan dagusan ng inihimlay sa saiyang huring hantungan si Pope Francis makalihis na magadan sa edad na 88 anyos makalihis ma-stroke, na humantong sa coma asin cardiac arrest kan nakalihis Abril 21.
