NAGA CITY- Pig-esplikar kan opisyal kan CASURECO II kun tano labing gayo an pag-umento sa taripa sa kuryente ngunyan na bulan nin Hulyo.
Sa entrevista kan Bombo Radyo Naga ki Rinner Bucay, tagapagtaram kan CASURECO II, pigsaysay kaini na kan nakalihis na bulan, nag-abiso an CASURECO II dapit sa power rates sa saindang mga nasasakupan.
Kun saen, dapat kuta nasa P11 hasta P12 kan nakalihis na bulan. Alagad kan Hunyo 13, 2024 nagpaluwas an Energy Regulatory Commission (ERC) nin order no.2024-017 kun saen, pigsusugo an Wholesale Electricity Spot Market (WESM) asin asin mga electric cooperative kaibanan na an CASURECO II na magpasunod nin standard payment. Boot sabihon kaini na an bill sa WESM kan nakalihis na Mayo an babangaon sa apat na bulan, na nagpuon kan Hunyo hasta Setyembre. Kun kaya, nagkataon na nagsunod an CASURECO II sa kasugoan kan ERC na imbes na P11 hasta P12 kan nakalihis na bulan an nagin P5 sana. Alagad, ngunyan na bulan igwa nin 25% standard asin current pay an CASURECO II sa WESM kun kaya naglangkaw an singil sa kuryente na gikan sa P5.9290 per kWh, ngunyan an nasa P12.2728 per kWh na.
Pag-abot man sa low voltage an dating P5.0537 per kWh kan nakalihis na bulan, ngunyan an nasa P11.3975 per kWh. Mantang sa high voltage, kan nakalihis na bulan, nasa P4.1259 per kWh, ngunyan na bulan an an nasa P10.5511 per kWh.
Mientrastanto, huli sa epekto kan pigbabayadan na power rates kan CASURECO II ngunyan na bulan, dakula an posibilidad na maglangkaw o mamantinir an taripa sa kuryente. Ini nin huli ta igwa pa man nin duwang bulan na standard payment an CASURECO II na dapat bayadan. Pigbabantayan man kan saindang lado na dae na maglangkaw an singil sa WESM tanganing dae na maglangkaw sa labi P12 an taripa sa kuryente kan CASURECO II.
Sa ngunyan, pangapodan na sana kan opisyal an pag-intindi gikan sa mga member consumers sa nangyayaring pagbabago sa mga taripa sa singil sa kuryente nin huli ta nagsusunod sana man an saindang opisina sa kasugoan gikan sa taas.
