NAGA CITY- Posibleng mayo na suboot ipautob na ipautob na ceasefire ngonyang pasko sa pag-ultanan kan militar asin New People’s Army (NPA) makalihis na pormal na ideklarar ni Presidente Rodrigo Duterte na sarong terrorist organization an mga ini.
Sa entrevista kan Bombo Radyo Naga ki Col. Teody Toribio, tagapagtaram kan Southern Luzon Command (SOLCOM), sinaysay kaini na imposible nang magkaigwa nin ceasefire ngonyan na pasko urog pa ta mas pinahigot pa kan saindang linyada an ginigibong mga military operations.
Makakasierto man suboot an namamanwaan na basado sa ley asin international humanitarian law an ikokondusir na mga internal security operations kan mga militar para masierto an katuninongan asin pagiging salbado sa sarong lugar.
Sa suway man na entrevista ki Capt. Joash Pramis, chief, Division of Public Affairs Office (DPAO), 9th Infantry Division, Philippine Army, sinaysay kaini na yaon na sa kamot kan saindang national headquarters kun magkakaigwa nin ipapautob na Suspension of Military Operations (SOMO) urog na ngonyan na pasko.
Mientrastanto, pigsierto man ni Pramis na mas magiging aktibo an militar sa pagtabang sa mga pulis sa paglapag sa mga miyembro kan CPP (Communist Party of the Philippines) – NPA siring man sa mga grupo na nagsusuporta digdi.
