Pigkumpirmar kan PhilippineCoast Guard (PCG) na sa kaenot-inuting pagkakataon naggamit an China nin Long Range Acoustic Device (LRAD) para i-harass an barko kan Pilipinas sa West Philippine Sea.
Sigun sa PhilippineCoast Guard karaniwan kaya na naggagamit an China nin waterr canons asin mga delikadong manuevers tanganing takuton an mga barko kan Pilipinas. Sa sarong pahayag sinaysay ni PCG spokesperson for the West Phil Sea Commodore Jay Tarriela naggamit an China nin Long Range Acoustic Device (LRAD) na sarong specialized loudspeakers na posibleng magluwas nin halangkaw na kusog kan tanog tanganing magin kawsa kan danyos sa eardrums pati na man an permanenteng pagkawara nin pagdangog.
Partikulamente na tinukoy ni Tarriela an China Coast Guard vessel na igwa nin hull number 3103 an naggamit kan LRAD para i-harass an BRP Cabra (MRRV-4409) tanganing pugulan an pagrani kaini.
Sinaysay ni Tarriela niribayan kan China Coast Guard-3103 an China Coast Guard-3304 tanganing iligal na magpatrulya sa parte kan exclusive economic zone kan Pilipinas. Sa ibong kan pangha-harass kan China Coast Guard dae digdi nagpatinag an BRP Cabra kan PhilippineCoast Guard.
Padagos an ginibong lakdang kan BRP Cabra tanganing malikayan an paglaog sa coastline kan Zambales.
Padagos man an pagtatao nin radio challenge kan PhilippineCoast Guard sa China Coast Guard asin sinabing an saindang presensiya an pagbalgar sa Philippine Maritime Zones Act, asin United Nations Convention on the Law of the Sea (UNCLOS).
