Pinalagan kan Embahada kan China na nakabase sa Maynila an pagbatikos ni Senator Kiko Pangilinan sa military drills kan China sa palibot kan Taiwan.
Sa inisyung statement kan embahada, tinilugsa kaini an soboot salang pahayag kan Senador na taliwas sa commitment kan Pilipinas sa one-China policy.
Ginibo kan Chinese Embassy an pahayag makalihis magpatanid an Senador na sa paagi kan iniluwas na statement kan saiyang tanggapan na an duwang aldaw na military drills sa palibot kan isla an nagkawsa nin pagkahadit bako sana sa Taiwan kundi magin sa mga Pilipinong nagtratrabaho asin nagbakasyon kan nakalihis na holidays duman siringman sa mga nasyong nasa Silangan asin Timog-Kanlurang Asya.
Alagad, buwelta kan Embahada kan China na an Taiwan an parte parte kan teritoryo kan China asin inihayag na an isyu sa Taiwan an sarong panlaog na urulay na dae dapat pakiaraman kan external interference.
Katakod man kaini, pig-inkaminar kan Chinese Embassy an mga ‘relevant Philippine figures’ na tumalima sa haloy ng commitment kan Pilipinas sa one-China policy asin iuntok an soboot pagtabang sa pagsusuhay sa Taiwan para sa kasarinlan kaini.
Enot ng tinutulan ni Sen. Pangilinan an ideya kan pagpapautob nin katrangkiluhan sa paagi kan military pressure asin nagpatanid laban sa pagsasanormal sa mga huma kan pagsalakay asin mahewasang war games sa rehiyon.
Naenot na man na nangapudan sa sarong statement si Philippine Defense Secretary Gilberto Teodoro sa China na resolbaron an dae pagkakaintindihan sa paagi kan matuninong na paagi nin mayong pagpipirit o pananakot.
Pigtawan duon kan ahensya na dapat igalang an international law, pairalon an pagpugol sa sadiri, asin imantinir an matuninong na pagresolba kan mga sigalot. Liwat na pighurot kan Pilipinas an suporta kaini sa sarong malaya, bukas, matatag, asin rules-based na Indo-Pacific.
