Mayong koneksyon sa impeachment complaints na pigsunad kontra ki VP Sara Duterte sa Christmas fellowship kan mga lehislador kaiba si Presidente Ferdinand Marcos Jr. na pigkundisir sa Malacañang Palace.
Ini an paglinaw kan House Deputy Majority Leader asin La Union Rep. Paolo Ortega. Segun pa ki Ortega na maabot sa 200 na mga Congressman an nag-atendir sa nasambitan ng dinner asin an highlight kan fellowship iyo an pagpresentar kan Chamber’s manifesto of support sa Chief Executive.
Nanindugan an lehislador na katuyuhan kan fellowship dinner na mas orog pang mapakusog an pag-iribahan asin maipahiling an suporta sa administrasyon ni Presidente Marcos. Kaya man mayong katotohanan an mga nagluluwas na bareta sa social media.
Dugang pa ni Ortega, haloy nang pigplano an nasambitan ng fellowship dinner, dae sana tulos na nadagos huli sa schedule conflict alagad nadagos man ini kan nakalihis na banggi kan petsa 4. Segun pa ki Ortega, antes an dinner, nagtao nin diskurso si Speaker Martin Romualdez asin iprinesentar an resolusyon nin suporta na enot na inaprobaran kan plenaryo.
Dugang pa ni Ortega na dae man napag-olayan an pulitika, pig-instruksyon sana kan Presidente an mga Congressman na gibuhon an saindang trabaho. Dae man sinambit kan Presidente sa dinner an saiyang pangapodan na dae suportaran an mga reklamo sa impeachment.
Sa ngunyan duwang impeachment complaints an kinakahampang ni VP Sara kabale sa mga basehan iyo an salang paggastos nin P612.5 million na confidential funds asin an banta sa buhay ni Presidente Marcos asin iba pang opisyales.
